ខេត្តមណ្ឌលគិរី ៖ នាព្រឹកថ្ងៃទី២៧ ខែតុលា ឆ្នាំ២០២០ ឯកឧត្តម ស្វាយ សំអ៊ាង អភិបាលខេត្តមណ្ឌលគិរី ដឹកនាំមន្ទីរអង្គភាពជំនាញ ចុះទៅពិនិត្យតាមបណ្ដាគោលដៅសំខាន់ៗជាច្រើន ក្នុងក្រុងសែនមនោរម្យ ដើម្បីកែលំអរសណ្ដាប់ធ្នាប់សាធារណៈ និងរៀបចំទីប្រជុំជនក្រុងឲ្យកាន់តែមានសោភ័ណ្ឌភាព ត្រៀមទទួលអ្នកទេសចរមកលេងកម្សាន្តក្នុងខេត្តមណ្ឌលគិរី ក្នុងព្រះរាជពិធីបុណ្យអុំទូកបណ្ដែតប្រទីប និងសំពះព្រះខែ អកអំបុក នៅពេលខាងមុខ។

ឯកឧត្ដម ស្វាយ សំអ៊ាង បានមានប្រសាសន៍ថា ទោះបីឆ្នាំនេះ រាជរដ្ឋាភិបាល មិនបានប្រារព្ធព្រះរាជពិធីបុណ្យអុំទូកបណ្ដែតប្រទីប និងសំពះព្រះខែ អកអំបុក ព្រោះ កត្តាគ្រោះធម្មជាតិ និងជំងឺកូវីដ១៩ ប៉ុន្តែប្រជាពលរដ្ឋមន្ត្រីរាជការគឺមានថ្ងៃសម្រាកជាធម្មតា ដែលនឹងមានអ្នកទេសចរមកលេងនៅខេត្តមណ្ឌលគិរី ដូចរៀងរាល់ឆ្នាំ ចំណុចនេះហើយទើបលោកដឹកនាំមន្ត្រីជំនាញចុះពិនិត្យមើលស្ថានភាពទូទៅក្នុង ក្រុង និងរៀបសណ្ដាប់ធ្នាប់ឲ្យមានរបៀបរាបរយ តួយ៉ាងគឺនៅចំណុចរង្វង់មូលគោព្រៃ លោកនឹងរៀបចំឲ្យមានទីធ្លាធំ ទម្លាយដើម្បីស្រួលដំណើរ និងមានទីតាំងសម្រាប់អ្នកទេសចរឈប់សំចត ចំណែកតាមដងផ្លូវមួយចំនួនក្នុងក្រុងលោក ក៏បានបញ្ជាឲ្យមន្ត្រីជំនាញជួសជុលការខូចខាត និងសម្អាតតាមដងផ្លូវផងដែរ។

ឯកឧត្ដមបញ្ជាក់ថា កន្លងមកក្នុងក្រុងសែនមនោរម្យ ពុំមានផ្សារនោះទេ ដែលកត្តានេះបានធ្វើឲ្យកើតមានការលក់ ដូរតាមទីសាធារណៈច្រើន ហើយបញ្ហានេះអាជ្ញាធរបាននឹងកំពុងបង្កើតផ្សារធំមួយ ដើម្បីឲ្យអាជីវករមានកន្លែងលក់ដូរត្រឹមត្រូវ និងងាយស្រួលឲ្យភ្ញៀវទេសចរ ចេញចូលទិញទំនិញផងដែរ។

ឯកឧត្ដម អភិបាលខេត្តមណ្ឌលគិរី បន្តទៀតថា ផ្សារថ្មីរបស់ក្រុងសែនមនោរម្យ មានទីតាំងធំទូលាយនិងងាយស្រួល ដល់ប្រជាពលរដ្ឋ និងអ្នកទេសចរចេញចូល ហើយនៅចុងឆ្នាំនេះផ្សារសែនមនោរម្យនឹងបើកដំណើរការចំនួន២៥០តូប។ ឯកឧត្ដម ស្វាយ សំអ៊ាង បញ្ជាក់ទៀតថា ក្រៅពីនេះអាជ្ញាធរ ក៏បាននិងកំពុងជំរុញការសាងសង់វិមានឯករាជ្យឲ្យឆាប់រួចរាល់ជាស្ថាពរ ដែលនេះជាសំណង់ប្រវត្តិសាស្ត្រមួយរបស់ខេត្តនឹងជួយឲ្យខេត្តមណ្ឌលគិរីកាន់តែទាក់ទាញ ស្រស់ស្អាត និងជាទីតាំងកម្សាន្តថ្មីមួយរបស់ប្រជាពលរដ្ឋ និងអ្នកទេសចរទៀតផង៕