ខេត្តស្វាយរៀង ៖ បុរសម្នាក់ដើរឆ្លងថ្នល់មិនបានប្រុងប្រយ័ត្នត្រូវរថយន្តបុកស្លាប់ភ្លាមៗនៅហ្នឹងកន្លែងហើយជនបង្កបានបើករថយន្តគេចបាត់ស្រមោលបន្សល់ទុកជនរងគ្រោះដេកស្លាប់នៅលើចិញ្ចើមថ្នល់គួរឲ្យសង្វេក។ ករណីគ្រោះថ្នាក់ចរាចរណ៍បានកើតឡើងនៅវេលាម៉ោង៦ និង៥១នាទីយប់ថ្ងៃទី២៤ ខែធ្នូ ឆ្នាំ២០២០ នៅលើកំណាត់ផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ១៤៣/១៤៤ស្ថិតក្នុងភូមិដើមពោធិ៍ឃុំកណ្តៀងរាយស្រុកស្វាយទាប ខេត្តស្វាយរៀង។

បើតាមសមត្ថកិច្ចបានឲ្យដឹងថា មុនពេលកើតហេតុគេឃើញជនរងគ្រោះដើរឆ្លងថ្នល់ជាតិលេខ១ ពីជើងទៅត្បូង ស្របពេលនោះក៏មានរថយន្ត០១គ្រឿង មិនស្គាល់ម៉ាក បានបើកពីទិសខាងកើតទៅលិចយ៉ាងលឿន ហើយបានបុកជនរងគ្រោះដែលកំពុងដើរថ្មើរជើងឆ្លងកាត់ថ្នល់ពីជើងទៅត្បូង ពេញទំហឹងខ្ទាតប៉ើងជាង១០ម៉ែត្របណ្តាលឲ្យស្លាប់ភ្លាមៗនៅហ្នឹងកន្លែងតែម្តង។ ចំណែតរថយន្តបង្កបានបន្ថែមល្បឿនបើករត់គេចខ្លួនទៅទឹសខាងលិចបាត់ស្រម៉ោលគ្មានអ្នកណាស្គាល់អត្តសញ្ញាណទេ។ជនរងគ្រោះឈ្មោះសុខ សឿយ ភេទប្រុស អាយុ៣៩ឆ្នាំ មុខរបរកម្មករសំណង់ មានស្រុកកំណើតនៅភូមិផ្លូវលាវ ឃុំប្រាសាទស្រុកព្រះនេត្រព្រះ ខេត្តបន្ទាយមានជ័យ បានស្លាប់នៅកន្លែងកើតហេតុ។

សមត្ថកិច្ចបន្តទៀតថា ជនរងគ្រោះដែលស្លាប់ គឺមិនទាន់មានអ្នកស្គាល់សាច់ញាតិដើម្បីផ្តល់ព័ត៌មានឲ្យបានដឹងមកទទួលយកសពទៅធ្វើបុណ្យទេដូច្នេះសមត្ថកិច្ចបានយកសពទៅរក្សាទុកនៅវត្តពោធិ៍បន្ទាយភូមិបន្ទាយឃុំកណ្តៀងរាយស្រុកស្វាយទាបរង់ចាំសាច់ញាត្តិមកទទួលយកទៅធ្វើបុណ្យតាមប្រពៃណី៕