ភ្នំពេញ ៖ មេដឹកនាំ​សម្ព័ន្ធភាព អ្នកប្រជាធិបតេយ្យ​ខ្មែរ ត្រូវបាន ក្រសួងមហាផ្ទៃ អញ្ជើញ ​ចូលរួម​កិច្ចប្រជុំ​ពិភាក្សា ពាក់ព័ន្ធ​នឹង​ការបង្កើត “​សម្ព័ន្ធភាព​អ្នកប្រជាធិបតេយ្យ​ខ្មែរ​” នៅ​រសៀល​ថ្ងៃទី​៤ ខែមករា ឆ្នាំ​២០២១ ខាងមុខនេះ នៅ​ទីស្តីការ​ក្រសួងមហាផ្ទៃ​​។​

​យោងតាមលិខិតអញ្ជើញរបស់ក្រសួងមហាផ្ទៃ គឺបានអញ្ជើញ លោក ម៉ម សូណង់ដូ ប្រធាន​គណបក្ស​សំបុក​ឃ្មុំ សង្គម​ប្រជាធិបតេយ្យ និង​ជា​ប្រធាន​សម្ព័ន្ធភាព អ្នកប្រជាធិបតេយ្យ​ខ្មែរ, លោក ញឹក ប៊ុនឆៃ ប្រធាន​គ​គណបក្ស​ខ្មែរ​រួបរួម​ជាតិ និង​ជា​អនុប្រធាន​សម្ព័ន្ធភាព អ្នកប្រជាធិបតេយ្យ​ខ្មែរ និង​លោក គុជ លី ប្រធានស្តីទី គណបក្ស​ខ្មែរ​តែមួយ និង​ជា​អគ្គលេខាធិការ សម្ព័ន្ធភាព​អ្នកប្រជាធិបតេយ្យ​ខ្មែរ។ កិច្ចប្រជុំនោះស្ថិតក្រោមការដឹកនាំរបស់លោក ប៊ុន ហុន រដ្ឋលេខាធិការ ក្រសួងមហាផ្ទៃ ។​

​សូមជម្រាបថា ​លោក ម៉ម សូណង់ដូ ប្រធាន​សម្ព័ន្ធភាព អ្នកប្រជាធិបតេយ្យ​ខ្មែរ កាលពី​ថ្ងៃទី​១៨ ខែវិច្ឆិកា ឆ្នាំ​២០២០ បានដាក់​លិខិត​ជូន សម្តេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ ជូនដំណឹង​ស្តីពី “​សម្ព័ន្ធភាព​អ្នកប្រជាធិបតេយ្យ​ខ្មែរ​”​។​ ចំពោះ​សមាសភាព ក្បាលម៉ាស៊ីន​ដឹកនាំ សម្ព័ន្ធភាព​អ្នកប្រជាធិបតេយ្យ​ខ្មែរ គឺ​លោក ម៉ម សូណង់ដូ ជា​ប្រធាន​សម្ព័ន្ធភាព អ្នកប្រជាធិបតេយ្យ​ខ្មែរ លោក ញឹក ប៊ុនឆៃ ជា​អនុប្រធាន លោក គុជ លី (​អនុប្រធាន​គណបក្ស​ខ្មែរ​តែមួយ​) អគ្គលេខាធិការ​៕​