សារលិខិតរបស់​សម្តេចកិត្តិព្រឹទ្ធបណ្ឌិតប៊ុន រ៉ានីហ៊ុនសែនប្រធានកាកបាទក្រហមកម្ពុជា ក្នុងឱកាសទិវាអន្ដរជាតិនៃអ្នកស្ម័គ្រចិត្ត៥ធ្នូឆ្នាំ២០២០ក្រោមប្រធានបទ«ស្ម័គ្រចិត្តរួមគ្នា យើងអាចធ្វើបាន»។ខ្លឹមសារលិខិតនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ បានថ្លែងថា «ក្នុងបរិបទកូវីដ-១៩ អ្នកស្ម័គ្រចិត្តរបស់ចលនាអន្ដរជាតិកាកបាទក្រហម និងអឌ្ឍចន្ទក្រហម ដែលជាអ្នកមានបទពិសោធន៍ជ្រៅជ្រះក្នុងការងារគ្រោះមហន្ដរាយ គឺពុំបាននឿយណាយឡើយ​ក្នុងការបន្ដស្ម័គ្រចិត្តចូលរួមក្នុងការប្រយុទ្ធជំងឺកូវីដ-១៩ ពោលគឺអ្នកស្ម័គ្រចិត្តបាននិងកំពុងខិតខំ​ប្រឹងប្រែងជួយដល់សហគមន៍ងាយរងគ្រោះទាំងឡាយ ក្នុងការជំនះឱ្យបានវិបត្តិភ័យនៃជំងឺរាតត្បាត ​ជាសកលដ៏កាចសាហាវមួយនេះ។ នៅគ្រប់ទីកន្លែង អ្នកស្ម័គ្រចិត្តបាននិងកំពុងបំពេញការងារ​របស់ខ្លួនដោយក្ដីមេត្តា ករុណា មុទិតា ឧបេក្ខា​និងប្រកបដោយក្ដីក្លាហានដើម្បីជំនះបានរាល់​ផល​ប៉ះពាល់​ដល់ជីវិត​ផ្ទាល់ខ្លួនផង ដល់ក្រុមគ្រួសារផង ដល់សហគមន៍ផង។»
ជាមួយ​គ្នានេះ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ សូមថ្លែងការកោតសរសើរ និងអំណរគុណយ៉ាងជ្រាលជ្រៅចំពោះវីរៈ​គ្រូពេទ្យកម្ពុជា បុគ្គលិកសុខាភិបាល ក្រុមគ្រូពេទ្យស្ម័គ្រចិត្តទាំងឡាយ​ដែលជាទ័ពជួរមុខដ៏សកម្ម​មិនខ្លាចនឿយហត់ និងគ្រោះថ្នាក់សោះឡើយដើម្បីកម្ពុជា កងកម្លាំងគ្រប់ប្រភេទ ​អាជ្ញាធរ​គ្រប់​លំដាប់ថ្នាក់ និងកម្លាំងស្ម័គ្រចិត្តទាំងអស់ រួមទាំងគណៈកិត្តិយស​សាខា-​អនុសាខា គណៈ​កម្មា​ធិការ សាខា-អនុសាខា យុវជន និងអ្នកស្ម័គ្រចិត្តកាកបាទក្រហមកម្ពុជា ចំពោះ​ការចូលរួមយ៉ាងសកម្ម​ដើម្បីសុខុមាលភាពសង្គម និងសុខភាពសាធារណៈ ទប់ស្កាត់បាន​មិនឱ្យកូវីដ-១៩ កើតមាន​ក្នុង​សហគមន៍។​ ថ្វីត្បិតយើងសម្រេចបានជោគជ័យគួរជាទីមោទក តែយើងមិនត្រូវស្កប់ស្កល់នឹងជ័យជំនះ​នេះ​ឡើយ«យើងអាចភ្លេចកូវីដ-១៩ តែកូវីដ-១៩​ពុំទៅណាឆ្ងាយពីយើងឡើយ»។ ពេលបច្ចុប្បន្ន​នេះ ព្រឹត្តិការណ៍សហគមន៍ ២៨ វិច្ឆិកា បាននិងកំពុងតែស្រែកអំពាវនាវដោយទទូច និងអង្វរករ​សុំឱ្យបង-ប្អូនរួមជាតិបន្ដយកចិត្តទុកដាក់លើកកម្ពស់អនាម័យ អនុវត្តវិធានការជាបន្ដបន្ទាប់របស់​ក្រសួង​សុខាភិបាល ជាពិសេសរក្សាបានភាពនឹងនរ មិនតក់ស្លុត ភ័យស្លន់ស្លោ ឆោឡោរហូត​បាត់បង់ម្ចាស់ការគ្រប់គ្រង ត្រូវបង្កើនការយកចិត្តទុកដាក់ កែប្រែទម្លាប់ផ្ទាល់ខ្លួន និងគ្រួសារមក «រស់នៅធម្មតា តាមបែបគន្លងថ្មី»។
ទន្ទឹមនឹងនេះ​ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ បានអំពាវនាវ​ដូចតទៅ៖
1- សូមគណៈកិត្តិយសសាខា-អនុសាខា គណៈកម្មាធិការ​សាខា-អនុសាខា មន្ដ្រី បុគ្គលិក យុវជន អ្នកស្ម័គ្រចិត្តកាកបាទក្រហមកម្ពុជា បន្ដពង្រឹង ពង្រីកការអប់រំផ្សព្វផ្សាយឱ្យ​បាន​កាន់​តែទូលំទូលាយថែមទៀត អំពីហានិភ័យនៃការឆ្លងជំងឺកូវីដ-១៩ ជាពិសេស​វិធានការនានារបស់ក្រសួងសុខាភិបាលក្នុងការទប់ស្កាត់មិនឱ្យកើតមានក្នុងសហគមន៍។
2- សូមបង-ប្អូនរួមជាតិ ដែលប៉ះពាល់ផ្ទាល់នឹងអ្នកវិជ្ជមានកូវីដ-១៩ សូមទៅធ្វើតេស្ដ​ជាបន្ទាន់ និងស្ម័គ្រចិត្តធ្វើចត្តាឡីស័កឱ្យបានគត់មត់ និងត្រឹមត្រូវ ដើម្បីបង្ការការចម្លង​ទៅ​បង-ប្អូន ក្រុមគ្រួសារខ្លួន និងអ្នកដទៃទៀត។
3- សូមបង-ប្អូន ដែលមានពាក់ព័ន្ធដោយប្រយោល ស្ម័គ្រចិត្តក្នុងការធ្វើចត្តាឡីស័កឱ្យ​បាន​ ត្រឹមត្រូវនិងគត់មត់។ បង-ប្អូន ដែលខ្វះលទ្ធភាពសូមទំនាក់ទំនងជាមួយអាជ្ញាធរមូលដ្ឋាន ដើម្បីទទួលការជួយឧបត្ថម្ភពីរាជរដ្ឋាភិបាល។
4- សូមបង-ប្អូនរួមជាតិទូទាំងប្រទេស រួមកម្លាំងសាមគ្គីភាពស្ម័គ្រចិត្តរួមគ្នាឈានទៅ​បញ្ចប់​ព្រឹត្តិការណ៍ ២៨ វិច្ឆិកា និងបន្ដសកម្មភាពប្រយុទ្ធនឹងជំងឺកូវីដ-១៩ ដើម្បីធានា​បាន លំនឹងសេដ្ឋកិច្ច សុវត្ថិភាពសង្គម និងការអភិវឌ្ឍក្នុងប្រទេសយើងក្រោមម្លប់​សន្ដិភាព។
សូមអានខ្លឹមសារទាំងស្រុងនៃ​សារលិខិតរបស់​ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ដែលមានដូចខាងក្រោមនេះ​ ៖