កណ្តាល ៖ ស្ត្រីម្នាក់ ជិះម៉ូតូជាមួយប្តីមិនប្រយ័ត្ន ធ្វើឲ្យសំពត់ចូលមីញ៉ុង បណ្តាលឲ្យដួលបោកក្បាលទៅនឹងថ្នល់ស្លាប់មួយរំពេច កាលពីវេលាម៉ោងជាង១២ថ្ងៃត្រង់ ថ្ងៃទី២៥ ខែឧសភា ឆ្នាំ២០២០ នៅលើកំណាត់ផ្លូវជាតិលេខ២១ ចំណុចមុខវត្តវេឡុវន្ត ស្ថិតនៅក្នុងភូមិព្រែកធន់ ឃុំព្រែកថ្មី ស្រុកកោះធំ ខេត្តកណ្តាល។

ស្ត្រីរងគ្រោះឈ្មោះ ស្លេះអំា មីណាស់ អាយុ ២៥ឆ្នាំ ជនជាតិខ្មែរ-ឥស្លាម មានទីលំនៅភូមិចាមក្រោម ឃុំព្រែកថ្មី ស្រុកកោះធំ ខេត្តកណ្តាល។

សាក្សីបានឲ្យដឹងថា មុនពេលកើតហេតុ ស្ត្រីរងគ្រោះបានជិះម៉ូតូជាមួយប្តីរបស់ខ្លួន ធ្វើដំណើរតាមបណ្តោយផ្លូវលេខ២១ ដោយមិនមានពាក់មួយការពារនោះទេ ក្នុងទិសដៅពីត្បូងមកជើង។ លុះធ្វើដំណើរមកដល់ចំណុចកើតហេតុ សំពត់របស់ស្ត្រីត្រូវមីញ៉ុងម៉ូតូស្រូបចូល បណ្តាលឲ្យធ្លាក់ពីលើម៉ូតូបោកក្បាលនឹងថ្នល់ស្លាប់ភ្លាមៗតែម្តង។

ប៉ូលិសបានបញ្ជាក់ថា ករណីនេះបង្កឡើងដោយ ការធ្វេសប្រហែសខ្លួនឯងទាំងប្តី និងប្រពន្ធ ពិសេសពួកគេមិនបានពាក់មួកការពារទាំងពីរនាក់។

ក្រោយកើតហេតុ សមត្ថកិច្ចជំនាញ និងកម្លាំងប៉ុស្តិ៍បានចុះទៅដល់កន្លែងកើតហេតុ រួចបានប្រគល់សាកសព ឲ្យក្រុមគ្រួសារយកទៅធ្វើបុណ្យតាមប្រពៃណី៕