ពលរដ្ឋវៀតណាម អាចធ្វើដំណើរចូលមកក្នុងប្រទេសកម្ពុជាឡើងវិញ នាពេលនេះ បានធ្វើឡើង តាមចំណារឯកភាពរបស់សម្តេចតេជោ ហ៊ុន សែន ថ្ងៃទី១៧ ខែមិថុនា ឆ្នាំ២០២០
(ភ្នំពេញ)៖ ក្រសួងការបរទេស បានចេញលិខិតមួយ គោរពជូនសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងកម្មវត្ថុ ស្តីពី ការអនុញ្ញាតឲ្យពលរដ្ឋវៀតណាម ចូលមកកម្ពុជាឡើងវិញ។ ការសម្រេចឲ្យពលរដ្ឋវៀតណាម អាចធ្វើដំណើរចូលមកក្នុងប្រទេសកម្ពុជាឡើងវិញ នាពេលនេះ បានធ្វើឡើង តាមចំណារឯកភាពរបស់សម្តេចតេជោ ហ៊ុន សែន ថ្ងៃទី១៧ ខែមិថុនា ឆ្នាំ២០២០។
ក្នុងលិខិតរបស់ក្រសួងការបរទេស ចុះថ្ងៃទី១៩ ខែមិថុនា ឆ្នាំ២០២០ បានលើកឡើងថា «ចាប់ពីពេលនេះតទៅ ជាមួយវៀតណាម កម្ពុជានឹងអនុវត្តសេចក្តីប្រកាសចុងក្រោយរបស់គណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ១៩ ចុះថ្ងៃទី២០ ខែឧសភា ឆ្នាំ២០២០ ដូចដែលបានអនុវត្តកន្លងរួចមកហើយ ជាមួយប្រទេសដទៃទៀត ដោយអនុញ្ញាតឲ្យពលរដ្ឋវៀតណាម ចូល ចេញព្រះរាជាណាចក្រកម្ពុជា និងតម្រូវឲ្យពលរដ្ឋវៀតណាមអស់ទាំងនោះ អនុវត្តតាមវិធានការសុខាភិបាល ដែលបានដាក់ចេញដោយគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ១៩»។
ក្រសួងការបរទេស ក៏បានលើកឡើងបន្ថែមថា ពលរដ្ឋវៀតណាម ជាពិសេសអ្នកបច្ចេកទេស វិនិយោគិន និស្សិត និងពលរដ្ឋវៀតណាមផ្សេងទៀត អាចនឹងទទួលបានទិដ្ឋាការផ្សេងៗ លើកលែងតែទិដ្ឋាការទេសចរណ៍ ស្របតាមអនុក្រឹត្យលេខ១២៣ អនុក្រ.បក ស្តីពី បែបបទសម្រាប់អនុវត្តចំពោះការអនុញ្ញាតឲ្យជនបរទេស មិនមែនអន្តោប្រវេសន៍ ចូល ចេញ និងស្នាក់អាស្រ័យនៅកម្ពុជា។
សូមរម្លឹកថា អំឡុងពេលផ្ទុះរាលដាលជំងឺកូវីដ១៩ គឺវៀតណាម បានបិទព្រំដែនជាមួយកម្ពុជា ដោយមិនអនុញ្ញាតឲ្យអ្នកដំណើរចេញចូលប្រទេសវៀតណាម លើកលែងតែទំនិញឆ្លងកាត់ព្រំដែន។ ក្នុងនោះ កាលពីថ្ងៃទី១៨ ខែមីនា ឆ្នាំ២០២០ ក្រសួងការបរទេសកម្ពុជា ក៏បានប្រកាសផ្អាកជាបណ្តោះអាសន្ន ចំពោះការធ្វើដំណើរចូលប្រទេសកម្ពុជា ដោយពលរដ្ឋវៀតណាម និងការធ្វើដំណើរចូលប្រទេសវៀតណាម ដោយពលរដ្ឋកម្ពុជា តាមផ្លូវគោក ផ្លូវទឹក និងផ្លូវអាកាស។
យ៉ាងណាក៏ដោយ ក្នុងវិធានការការពារ និងទប់ស្កាត់ការឆ្លងរាលដាលជំងឺកូវីដ១៩ រាជរដ្ឋាភិបាលកម្ពុជា កាលពីថ្ងៃទី២០ ខែឧសភា ឆ្នាំ២០២០ បានចេញប្រកាស ដោយតម្រូវឲ្យអ្នកដំណើរចូលមកកម្ពុជា ត្រូវមានសំបុត្រពេទ្យបញ្ជាក់ថា មិនមានជំងឺកូវីដ១៩ មានធានារ៉ាប់រងតម្លៃចាប់ពី ៥ម៉ឺនដុល្លារ តម្កល់ប្រាក់ ៣០០០ដុល្លារ សម្រាប់ពិនិត្យព្យាបាលជំងឺកូវីដ១៩ ព្រមទាំងត្រូវធ្វើតេស្តរកជំងឺកូវីដ១៩ នៅពេលមកដល់កម្ពុជា និងត្រូវធ្វើចត្តាឡីស័ករយៈពេល ១៤ថ្ងៃ ដើម្បីតាមដានរកជំងឺកូវីដ១៩៕
