ភ្នំពេញ ៖ នៅព្រឹកថ្ងៃព្រហស្បតិ៍ ១១រោច ខែអាសាឍ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី១៦ ខែកក្កដា ឆ្នាំ២០២០នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញដឹកនាំកិច្ចប្រជុំស្ដាប់របាយការណ៍ស្ដីពីការបញ្ចូលការងារតភ្ជាប់ទាញយកទិន្នន័យរវាងប្រព័ន្ធទិន្នន័យអគ្គនាយកដ្ឋានអត្តសញ្ញាណកម្ម និងប្រព័ន្ធផ្លាស់ប្ដូរទិន្នន័យ CamDX សម្រាប់បំរើដល់ការចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន (IT Platform) នៅទីស្ដីការក្រសួងមហាផ្ទៃ។

ឯកឧត្តម នាយឧត្តមសេនីយ៍ កង សុខន អគ្គនាយកនៃអគ្គនាយកដ្ឋានអត្តសញ្ញាណកម្ម បានធ្វើរបាយការណ៍ជូនសម្ដេច ព្រមទាំងអង្គប្រជុំថាការភ្ជាប់ទិន្នន័យ CamDX បានធ្វើឡើងបន្ទាប់ពីក្រសួងសេដ្ឋកិច្ច និងហិរញ្ញវត្ថុ ដាក់សំណើមកសម្ដេចក្រឡាហោមឧបនាយករដ្ឋមន្ត្រី និងបន្ទាប់ពីទទួលបានការឯកភាពពីសម្ដេច ដោយសម្ដេចបានណែនាំឱ្យអគ្គនាយកដ្ឋានអត្តសញ្ញាណកម្មទទួលមុខការផ្ដល់កិច្ចសហការ ។ អគ្គនាយកដ្ឋានអត្តសញ្ញាណកម្មក៏បានចាត់តាំងក្រុមបច្ចេកទេសទៅរួមបញ្ចូលជាមួយក្រសួងសេដ្ឋកិច្ច និងហិរញ្ញវត្ថុ ហើយក្រសួងសេដ្ឋកិច្ច ក៏បង្កើតក្រុមការងារអន្តរក្រសួង ដោយមានការចូលរួមគាំទ្រពីក្រុមហ៊ុន ។

ឯកឧត្តមបានបន្តថា មកដល់ពេលនេះ បន្ទាប់ពីមានការភ្ជាប់ប្រព័ន្ធទិន្នន័យជាមួយអគ្គនាយកដ្ឋានអត្តសញ្ញាណកម្ម មានក្រុមហ៊ុនជាង១០០ហើយ ដែលត្រូវបានក្រសួងសេដ្ឋកិច្ច និងហិរញ្ញវត្ថុ ដាក់សំណើផ្ទៀងផ្ទាត់អត្តសញ្ញាណអ្នកស្នើសុំចុះបញ្ជីក្រុមហ៊ុន។

យ៉ាងណាក៏ដោយ ឯកឧត្តមអគ្គនាយកបានគូសបញ្ជាក់ថានេះគឺជាការអនុវត្តសាកល្បងរបស់ក្រសួងសេដ្ឋកិច្ច និងហិរញ្ញវត្ថុ និងអគ្គនាយកដ្ឋានអត្តសញ្ញាណកម្មតែប៉ុណ្ណោះ ពោលគឺមិនទាន់ដាក់ឱ្យដំណើរការជាផ្លូវការនៅឡើយទេ ដោយសារក្រុមការងារត្រូវរៀបចំបទដ្ឋានគតិយុត្តិជាក់លាក់ជាមុនសិន។

ឯកឧត្តមអគ្គនាយកក៏បានជម្រាបជូនសម្ដេច និងអង្គប្រជុំដែរថា ការទាញយកទិន្នន័យពីអគ្គនាយកដ្ឋានអត្តសញ្ញាណកម្មនេះ ក៏មានការតម្រឹមដែនកំណត់មួយច្បាស់លាស់ដែរ ដោយមិនអាចប្រើប្រាស់ឱ្យលើសពីអ្វីដែលបានឯកភាពគ្នានោះទេ ហើយថារាល់ការស្នើសុំដែលលើសពីនេះគឺត្រូវមានការឆ្លងកាត់ការពិភាក្សាគ្នាសិន។

ឯឧត្តមបានជម្រាបជូនសម្ដេច និងអង្គប្រជុំ នូវសំណើរសុំឱ្យមានការរៀបចំលិខិតបទដ្ឋានគតិយុត្តិក្នុងកម្រិតណាមួយ ឬអាចជាប្រកាសអន្តរក្រសួង មុននឹងឈានទៅដាក់ឱ្យដំណើរការការភ្ជាប់ទិន្នន័យនេះ និងសំណើមួយចំនួនទៀតដើម្បីគាំទ្រឱ្យដំណើរការភ្ជាប់ទិន្នន័យនេះបានប្រព្រឹត្តទៅដោយជោគជ័យ។ ប្រព័ន្ធ CamDX គឺជាថ្នាលសម្រាប់ផ្លាស់ប្ដូរទិន្នន័យមានលក្ខណៈឯកភាវូបនីយកម្ម និងយកលំនាំតាមកម្មវិធីស្តង់ដា ដែលប្រទេសអេស្តូនីបានប្រើប្រាស់ នេះបើតាមបទបង្ហាញបន្ថែមពីមន្ត្រីជាន់ខ្ពស់អគ្គនាយកដ្ឋានអត្តសញ្ញាណកម្ម ។

បើតាមបទបង្ហាញ ផ្អែកលើបទពិសោធន៍ជោគជ័យរបស់អេស្តូនី ក្នុងការរៀបចំរដ្ឋាភិបាលបែប E-Government ការភ្ជាប់ទិន្នន័យនេះ មានចំណុចពិសេសៗ៥ រួមមាន ការប្រើប្រាស់ទម្រង់ប្រព័ន្ធអេកូស៊ីស្ទេម, ផ្ដល់សុវត្ថិភាពខ្ពស់ក្នុងការផ្លាស់ប្ដូរទិន្នន័យ, មិនជ្រៀតជ្រែកការគ្រប់គ្រងទិន្នន័យរបស់ស្ថាប័នម្ចាស់ទិន្នន័យ, មានប្រព័ន្ធតាមដានមើលការប្រើប្រាស់តែមិនអាចមើលខ្លឹមសារនៃទិន្នន័យ និងការអនុលោមតាមគោលការណ៍ផ្លាស់ប្ដូរទិន្នន័យតាមទម្រង់API។

នៅក្នុងឱកាសនោះដែរ ឯកឧត្តមរដ្ឋលេខាធិការទទួលបន្ទុក និងឯកឧត្តមរដ្ឋលេខាធិការ ព្រមទាំងអង្គប្រជុំ ក៏បានចូលរួមមតិយោបល់ពាក់ព័ន្ធនឹងដំណើរការភ្ជាប់ទិន្នន័យនេះដែរ។ តាមរយៈការចូលរួមយោបល់នោះការងារនេះបានទទួលការគាំទ្រ ប៉ុន្តែមានការស្នើសុំឱ្យគិតគូគ្រប់ជ្រុងជ្រោយអំពីការធានាបាននូវអធិបតេយ្យនៃការគ្រប់ទិន្នន័យ ការទប់ស្កាត់ហានីភ័យនានា ដូចជាក្រុមចោរអ៊ីនធើណែត និងមេរោគក្នុងប្រព័ន្ធបច្ចេកវិទ្យាជាដើម ។

សម្ដេចក្រឡាហោម ស ខេង ឧបនាយករដ្ឋមន្ត្រី បានមានប្រសាសន៍ណែរនាំបន្ថែមទៅកាន់អង្គប្រជុំ ដោយសម្ដេចបានវាយតម្លៃខ្ពស់ចំពោះវឌ្ឍនភាពនៃដំណើរការភ្ជាប់ទិន្នន័យរវាងអគ្គនាយកដ្ឋានអត្តសញ្ញាណកម្ម និងក្រសួងសេដ្ឋកិច្ច និងហិរញ្ញវត្ថុ។ សម្ដេចក៏បានថ្លែងអំណគុណចំពោះការចូលផ្ដល់មតិយោបាលល្អៗពីសំណាក់ឯកឧត្តមរដ្ឋលេខាទទួលបន្ទុក ឯកឧត្តមរដ្ឋលេខា និងអង្គប្រជុំទាំងមូល។

សម្ដេចក្រឡាហោម ស ខេង ឧបនាយករដ្ឋមន្ត្រី បានមានប្រសាសន៍ថា ការរៀបចំលិខិតបទដ្ឋានគតិយុត្តិគួរតែរៀបចំជាអនុក្រឹត្យ ព្រោះការរៀបចំប្រកាសអន្តរក្រសួងនឹងនាំឱ្យមានប្រកាសច្រើន ដោយយសារទិន្នន័យរបស់អគ្គនាយកដ្ឋានអត្តសញ្ញាណកម្ម នឹងត្រូវភ្ជាប់ជាមួយនឹងទិន្នន័យក្រសួងស្ថាប័នពាក់ព័ន្ធនានារបស់រដ្ឋជាច្រើនទៀត។ ដូច្នេះសម្ដេចបានណែនាំឱ្យធ្វើសេចក្ដីព្រាងអនុក្រឹត្យ ដើម្បីពង្រីកវិសាលភាពអនុវត្តក្នុងក្របខណ្ឌរាជរដ្ឋាភិបាលតែម្ដង៕