ខេត្តព្រះសីហនុ ៖ ទូកមួយគ្រឿងបានប៉ះរលកបែកទូកលិចចូលក្នុងសមុទ្រនៅចំណុចឃ្លងឡទឹកត្រី ក្រុងកោះរ៉ុងនៅវេលាម៉ោងជិត៤ល្ងាចថ្ងៃ០១ ខែសីហា ឆ្នាំ២០២០ ក្រោមការបញ្ជាផ្ទាល់ពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ក្រោយទូកនោះលិចមនុស្សនៅលើទូកត្រូវបានជួយសង្គ្រោះបានទាំងអស់ហើយ មិនមានអ្នករងគ្រោះដល់ជីវិតទេ។

ទាក់ទងនឹងករណី ទូកឈើបែកក្តារនៅពេលដែលមានរលកខ្លាំងនេះ បើតាមការបញ្ជាក់ពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុបានបញ្ជាក់ថា ទូកដែលលិចនោះគឺមិនមានមនុស្សជិះនោះទេ គឺទូកនោះបោះយុទ្ធការទុកចោល ហើយទូកឈើដែល មានមនុស្សជិះចំនួន១៥នាក់គឺបែកក្តារទឹករលកបោកខ្លាំងដោយមានការជួយសង្គ្រោះទាន់ពេលមិនមានប៉ះពាល់ ដល់អាយុជីវិត ដល់អ្នកជិះនៅលើទូកនោះទេ។ ក្រោយកើតហេតុ មានការជួយសង្គ្រោះដោយ កម្លាំងនគរបាលនិងសមត្ថកិច្ចមូលដ្ឋាន ព្រមទាំងអូប៊័រល្បឿនលឿនក្រុមហ៊ុន GTVC របស់លោកឧកញ៉ាទៀ វិចិត្រ និងទូកនេសាទស្ម័គ្រចិត្តមួយចំនួនទៀត។

ក្រោយពីជួយសង្គ្រោះលោកអភិបាលក្រុងបានឲ្យទូកនេសាទ ដែលបានទៅជួយទូកមានបញ្ហានាំបងប្អូនដែលជួបគ្រោះថ្នាក់ដោយទូកលិចនេះមកសង្គ្រោះនៅមន្ទីរពេទ្យបង្អែកខេត្ត ដោយមិនមានគ្រោះថ្នាក់ដល់អាយុជីវិតនោះឡើយ មកដល់ព្រឹកថ្ងៃទី០២ ខែសីហា ឆ្នាំ ២០២០។

បើតាមការឲ្យដឹងពី មន្ត្រីនគរបាលចរាចរណ៍ផ្លូវទឹកបានឲ្យដឹងថា ដោយមានការបញ្ជាផ្ទាល់ពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុមិនអនុញ្ញាតឲ្យទូកទេសចរណ៍ក៏ដូចជាទូកនេសាទចេញទៅប្រកបរបរនៅលើផ្ទៃសមុទ្រក៏ដូចជាទៅបណ្ដាកោះផ្សេងៗឡើយ ព្រោះខ្លាចមានករណីគ្រោះថ្នាក់កើតឡើងជាយថាហេតុ ខណៈពេលដែលអាកាសធាតុនៅតែកំពុងមានភ្លៀងខ្យល់រលក បោកបក់ខ្លាំង ដែលក្រសួងធនធានទឹកបានធ្វើសេចក្តីជូនដំណឹងថានឹងមានភ្លៀងព្យុះរលកបោកបក់ខ្លាំងពីថ្ងៃទី០១ ដល់ថ្ងៃទី០៤ ខែសីហា ឆ្នាំ២០២០ទើប ស្ងប់ស្ងាត់ទៅវិញ៕