ភ្នំពេញ ៖ តុលាការរាជធានីភ្នំពេញ នៅថ្ងៃនេះបានបើកសវនាការ លើសំណុំរឿង លោក រ៉ុង ឈុន ពាក់ព័ន្ធករណីញុះញង់បង្កឲ្យមានភាពវិកវរដល់ សន្តិសុខសង្គម និងបញ្ហាព្រំដែនកម្ពុជា។

សមត្ថកិច្ចបានចាប់ខ្លួនលោក រ៉ុង ឈុន កាលពីថ្ងៃទី៣១ ខែកក្កដា ឆ្នាំ២០២០កន្លងទៅ ខណៈដែលលោកចុះទៅកាន់ព្រំដែន កម្ពុជា-វៀតណាម ខេត្តត្បូងឃ្មុំ ហើយបានចេញសេចក្តីថ្លែងការណ៍ជាសាធារណដោយអះអាងថា ការបោះបង្គោល ព្រំដែនថ្មីរវាងកម្ពុជា និងវៀតណាមបានចូលជ្រៅមកទឹកដីកម្ពុជាប្រមាណ៥០០ម៉ែត្រ។ ភ្លាមៗនោះគណៈកម្មាធិការ ចម្រុះកិច្ចការព្រំដែនកម្ពុជា បានប្រកាសទាត់ចោល នូវសេចក្តីថ្លែងការណ៍របស់លោក រ៉ុង ឈុន ដោយចាត់ទុកថា ជាការផ្សាយព័ត៌មានមិនពិត និងបំផ្លើស។ គណៈកម្មាធិការចម្រុះកិច្ចការព្រំដែន ចាត់ទុកថា ការផ្សាយរបស់លោក រ៉ុង ឈុន មានចេតនាទុច្ចរិត ក្នុងគោលបំណងបំភាន់សាធារណមតិជាតិ និងអន្តរជាតិ ដោយធ្វើការចោទប្រកាន់ដោយគ្មានមូលដ្ឋាន មកលើការងារព្រំដែនរបស់រាជរដ្ឋាភិបាល៕