ខេត្តកណ្ដាល ៖ សមត្ថកិច្ចនគរបាល ខេត្តកណ្តាល បានចាប់ខ្លួនជន សង្ស័យជាឃាតករចាក់សម្លាប់នារីវ័យក្មេងម្នាក់ស្លាប់ក្នុងឈាមនោះ ហើយ បន្ទាប់ពីធ្វើសកម្មភាពបានប្រមាណជិត២ម៉ោងប៉ុណ្ណោះ។

សមត្ថកិច្ចបានឲ្យដឹងថា ជនសង្ស័យមានឈ្មោះ ទូច សជាតិ ហៅ (អាដំរី) អាយុ៣៥ឆ្នាំ រស់នៅកន្លែងកើតហេតុខាងលើ។ ការឃាត់ខ្លួនជនដៃដល់រូបនោះ ខណៈដែលជនសង្ស័យធ្វើជាប្រើល្បិចមកមើលសាកសព ដែលសមត្ថកិច្ចមកដល់កន្លែង កើតហេតុពិនិត្យ និងធ្វើកោសល្យវិច្ឆ័យ។

សូមបញ្ជាក់ថា នៅវេលាម៉ោង៧ និង៣០នាទីព្រឹកថ្ងៃទី៥ ខែមករា ឆ្នាំ២០២១ មានអំពើឃាតកម្មមួយបានកើតឡើងនៅ ភូមិ-សង្កាត់ ព្រែកហូរ ក្រុងតាខ្មៅ ខេត្តកណ្ដាល ជនដៃដល់បានយកកាំបិតចាក់ជាច្រើនកន្លែងនៅលើដើមទ្រូង និងពោះជនរងគ្រោះ។ ក្រោយកើតហេតុ ក្រុមគ្រួសារបានដឹកជនរងគ្រោះទៅកាន់មន្ទីរពេទ្យជ័យជំនៈ ប៉ុន្តែជាអកុសលមុខរបួសមានសភាពធ្ងន់ធ្ងរ ក៏បណ្ដាលឱ្យជនរងគ្រោះត្រូវស្លាប់ពេលជូនដល់មន្ទីរពេទ្យ។

សមត្ថកិច្ចបានបន្តថា ក្រោយកើតហេតុប្រមាណជាង១ម៉ោង សមត្ថកិច្ចក៏បានក្តាប់មុខសញ្ញាបាន បន្ទាប់ពីទទួលដំណឹង ខ្លះៗពីសាក្សីដែលត្រូវជាប្អូនថ្លៃសពជនរងគ្រោះ ទើបសមត្ថកិច្ចធ្វើការឃាត់ខ្លួនជនសង្ស័យជាឃាតក ខាងលើយកមក ធ្វើការសាកសួរតាមនីតិវិធី។

ក្រោយពីសមត្ថ កិច្ចចាប់ខ្លួនបាន ឃាតករដៃឆៅ បានឆ្លើយសារភាពថា មូលហេតុដែលខ្លួនចាក់សម្លាប់ នារីរងគ្រោះអាយុ១៨ឆ្នាំនោះ ដោយខ្លាចបែកការដឹងដល់ឪពុកម្តាយជនរងគ្រោះ ខណៈដែលគេបានចាប់រំលោភ កាលពី៧ថ្ងៃនេះ៕