ខេត្តកំពត ៖ ឯកឧត្ដម​ ជាវ​ តាយ​ អភិបាល នៃគណៈអភិបាលខេត្តកំពត​ និងជាប្រធានគណៈកម្មាធិការគ្រប់គ្រងដីរដ្ឋថ្នាក់ខេត្ត​ នាព្រឹកថ្ងៃព្រហស្បតិ៍​ ៦រោច​ ខែផល្គុន​ ឆ្នាំជូត​ ទោស័ក​ ព.ស​ ២៥៦៤​ ត្រូវនឹងថ្ងៃទី០៤​ ខែមីនា​ ឆ្នាំ២០២១​ បានដឹកនាំកិច្ចប្រជុំគណៈកម្មាធិការគ្រប់គ្រងដីរដ្ឋថ្នាក់ខេត្ត​ ដើម្បីត្រួតពិនិត្យដីសម្បទានសង្គមកិច្ចនៅក្នុងភូមិសាស្រ្តខេត្តកំពត​ ដោយមានការអញ្ជើញចូលរួមពី​ ឯកឧត្តម​អភិបាលរងខេត្ត​ ប្រធានមន្ទីរ​ អង្គភាពពាក់ជុំវិញខេត្ត​ និងអាជ្ញាធរក្រុង​ ស្រុកសរុប​ ៣៧នាក់។

មានប្រសាសន៍នៅក្នុងកិច្ចប្រជុំ​ ឯកឧត្ដម​ ជាវ​ តាយ​ បានស្នើដល់មន្ទីររៀបចំដែនដីនគរូបនីយកម្ម​ សំណង់​ និងសុរិយោដីខេត្ត​ ត្រូវត្រួតពិនិត្យមើលលទ្ធភាពពាក់ព័ន្ធការគ្រប់គ្រងដីរដ្ឋ​ ដើម្បីទុកសំរាប់ដីសម្បទានសង្គមកិច្ចជូនដល់អតីតយុទ្ធជន​។ ទន្ទឹមនោះ ឯកឧត្ដម​អភិបាល​ខេត្ត​ ក៏បានសំណូមពរដល់គណៈកម្មការគ្រប់គ្រងដីរដ្ឋថ្នាក់ខេត្តទាំងអស់​ ត្រូវរួមគ្នាដោះស្រាយ និងរួមគ្នាទទួលខុសត្រូវ​ ដើម្បីឲ្យការងារនេះទទួលបានលទ្ធផលល្អនៅពេលខាងមុខ៕